Xəbər verildiyi kimi, bir müddət öncə İran İnqilab Keşikçiləri Korpusunun ("Sepah") sabiq komandanı Möhsün Rzayiyə bağlı olan "Tabnak" saytında "bir təbrizli tədqiqatçı"nın Azərbaycan prezidenti İlham Əliyevə ünvanlanmış açıq məktubu yerləşdirilmişdi. Bəzi qərəzli insanlar bu anonim məktubun meydana çıxmasını millət vəkili Sabir Rüstəmxanlının İran rəhbəri Seyid Əli Xameneyiyə yazdığı açıq məktubun "nəticəsi" kimi qiymətləndirsələr də, əslində belə deyil. İş orasındadır ki, "Cənab Əliyev, İraqa və Əfqanıstana əsgər göndərməkdənsə, Qarabağ barədə düşünün!" başlıqlı həmin məktubun əsasını təşkil edən müddəalar, necə deyərlər, köhnə bayatılardır, zaman-zaman paniranistlərin anti-Azərbaycan mətbuatında və İnternet saytlarında səsləndirilmiş fikirlərdir – Quzey Azərbaycan ərazisinin tarixən "Aran" adlanması və "böyük İran"ın bir parçası olması, əhalinin daim "İrana birləşməyə can atması", guya Azərbaycan Respublikası hökumətinin Qərbin və sionistlərin əlində oyuncaq olması, ölkəmizdə milli azlıqların hüquqlarının pozulması, dini fəaliyyətlərə məhdudiyyət qoyulması, gənclərin Qərb dəyərləri ruhunda böyüdülüb dini-məzhəbi köklərdən uzaq salınması, Qarabağ probleminin həllinin Minsk qrupuna həvalə edilərək mövcud islami potensialdan istifadə olunmaması və s. Odur ki, sözügedən məktub hətta paniransitlərin özləri arasında da elə bir xüsusi marağa səbəb olmadı. Daha maraqlısı, Bakıda yaşayan Əli Əsğər Şəfiiyan adlı bir iranlının kimliyi bəlli olmayan həmin "təbrizli tədqiqatçı"ya yazdığı cavabdır. Bu cavab bir neçə gün əvvəl yazılmış və müəllifin şəxsi vebloqunda yerləşdirilmişdir.
"Təbrizli tədqiqatçı"ya ünvanladığı cavabın əvvəlində Ə.Ə.Şəfiiyan onun sözlərinin ziddiyyətli olduğunu vurğlayaraq, mühakimə və qiymətləndirmələrin reallığa əsaslanmasının vacibliyinə işarə edir və bununla bağlı maraqlı bir misal çəkir: "1997-ci ildə bir nəfər Bakıdan mərhum ayətullah Meşkiniyə xəbər aparır və o Allah bəndəsi də həmin xəbərə əsaslanıb üləmaları yığır ki, bəli, Azərbaycan Respublikasında islam inqilabı baş verməkdədir!"

Ə.Ə.Şəfiiyan daha sonra "təbrizli tədqiqatçı"ya müraciətlə yazır: "Siz öz məktubunuzda (Azərbaycan Respublikası ilə bağlı) sizi narahat məsələləri bu cür sadalamısınız: İsraillə əlaqələr, Qarabağ qaçqınlarının qeyri-müəyyən durumu, xalqa tarixi kimiliyini unutdurmaq siyasəti, azlıqların vəziyyəti, nəsillər arasında uçurum, dini fəaliyyətlərin məhdudlaşdırılması və İran əhalisinə qarşı bəzi təhrikçi addımlar.
Əvvəla, bu ölkənin (Azərbaycan Respublikasının – M.M.) əhalisi İran əhalisi qədər Fələstin məsələsindən agah deyil və ona həssaslıq göstərmir. İkincisi, Azərbaycan İslam Konfransı Təşkilatının İsraillə bu cür əlaqələrə malik yeganə üzvü deyil. Amma qeyd etdiyiniz kimi, onların (azərbaycanlıların – M.M.) ölkəsinin 20%-i yadların işğalı altındadır, Qarabağ bölgəsi Ermənistan tərəfindən işğal edilib. Biz Fars körfəzi məsələsinə həssaslıqla yanaşdığımız və Tombe-kuçek, Tombe-bozorg və Əbu Musa adalarını İran torpağı bildiyimiz kimi, bu diyarın əhalisi də Qarabağı öz torpağı bilir.
Cənab tədqiqatçı!
Siz təsəvvür etmirsiniz, İran İslam Respublikasının iki işğalçıya yönəlik ikili siyasəti necə də ziddiyyətlidir: o, bir tərəfdən sünni Fələstin əhalisini qaçqın vəziyyətinə salmış sionistlərin əleyhinədir, digər tərəfdən isə Qarabağı işğal etmiş və bir milyon şiəni qaçqın durumuna salmış ermənilərin yanındadır. Elə isə bunlar siyasətin ata-anası olmadığı nəticəsinə gəlməkdə və İsraillə əlaqə qurmaqda haqlıdırlar…
Bir həftə bundan qabaq bir müxbir İranın Bakıdakı səfirindən soruşdu: "İran nə üçün Azərbaycan torpaqlarını işğal etmiş təcavüzkar Ermənistanı dəstəkləyir?" Görün, məsələni necə dolaşdırırıq: "Qəsbkarlıqla işğalçılıq arasında fərq var. Sionist rejim müsəlman torpağını qəsb edib, onun əhalisini qaçqın salıb və Fələstin ölkəsinin adını silib. İki ölkə – Ermənistanla Azərbaycan arasında vəziyyət belə deyil və İran Azərbaycan Respublikasının ərazi bütövlüyünü dəstəkləyir".
Cənab tədqiqatçı!
Azərbaycan Respublikasının dindar əhalisi məhz bu cəhətdən ən çox təzyiqə məruz qalır, onlar bilmirlər ki, nə cavab versinlər… Bizim Ermənistanla əlaqələrimizdən o qədər narahat olanlar var ki, yaxşısı budur, araşdırmalarınızı təkmilləşdirmək üçün özünüz gələsiniz və bir müddət onların sözlərinə qulaq asasınız.
Cümə günü Naxçıvandan olan həmkarım mənə dedi ki, eşitdiyinə görə, İran Qarabağda mobil rabitə şəbəkəsinin genişləndirilməsi üçün Ermənistanla əməkdaşlıq edir. Xəbəri gördüm, düz deyirdi: İranın mobil telefon operatoru "Telekomunikeyşn Kiş" şirkəti "Qarabağ Telekom" şirkəti ilə rouminq sazişi imzalayıb ki, işğal olunmuş Qarabağ bölgəsində onun xidmətindən istifadə olunsun. Yaxşı, bizim kələyimiz yalnız bundan ibarətdir ki, bu işi özəl bir şirkətin əli ilə görürük.
Həqiqətən, bu ölkənin əhalisi anlaya bilmir ki, məsələn, İsrail barədə o cür odlu-alovlu şəkildə danışan Əhmədinejad niyə Qarabağın şiə qaçqınları haqqında bir söz söyləmir? Siyasətdir? Yaxşı, onda onların etdiyinin adı da siyasətdir, onlar da istəyirlər ki, yəhudi lobbisi ABŞ-da və digər yerlərdə Ermənistanın qarşısında onları dəstəkləsin…
Əziz tədqiqatçı!
Deyirsiniz ki, son dövrdə Bakıya səfər etmiş, amma şəhidlərin şərəfinə qoyulmuş bir abidə görməmisiniz. Halbuki ermənilərin əli öldürülmüş insanların şərəfinə həm şəhərin özündə, həm də ətraf yerlərdə xatirə abidələri ucaldılmışdır. Şəhidlər Xiyabanı şəhərin ən yaxşı yerindədir və Bakıya gələn hər kəs ora baş çəkir. Şuşa, Xocalı və s. şəhrlərdə baş vermiş qırğınların ildönümündə ardıcıl televiziya verilişləri göstərilir.
Problem bundadır ki, biz öz ölkəmizi yaxşı qurmamışıq…, buna görə də bu ölkənin (Azərbaycanın – M.M.) əhalisi bizim fəaliyyətimizdən razı deyil. Amma siz məktubu elə yazmısınız ki, guya bu gün Azərbaycan Respublikasında referendum keçirilsə, insanlar İran İslam Respublikasının himayəsinə keçməyə səs verəcəklər! Xeyr, belə şey yoxdur, tədqiqatçı dost, inqilabın poçt vasitəsilə məktub göndərməklə ixracı mümkün deyil!
Sonda ötən ilin yayında Bakıda cənab Müttəkiyə dediyim sözü bir daha təkrarlamaq istəyirəm: Qarabağ bu diyarın əhalisi üçün Qüdsün fələstinlilərdən ötrü malik olduğundan az əhəmiyyət kəsb etmir, İslam Respublikası bu məqama xüsusi diqqət yetirməlidir.

Əli Əsğər Şəfiiyan
Bakı, 25 may 2008-ci il"

Qeyd edək ki, cavabın müəllifi Əli Əsğər Şəfiiyan, özünün yazdığına görə, 1976-cı ildə Mazandaran əyalətinin Nouşəhr bölgəsində doğulub. İxtisasca mühəndis olsa da, yeddi il İSNA agentliyində müxbir və siyasi şərhçi kimi çalışıb. Əhmədinejad hakimiyyətə gəldikdən sonra həmin agentlikdən çıxıb. Hazırda Bakıda yaşayır və iqtisadi fəaliyyətlə məşğuldur.